Mediat angleze raportojnë për ndalimin nga policia të biznesmenit italian Francesco Becchetti. Sipas Daily Mail pronari i Agon Channel dhe klubit anglez të futbollit Leyton Orient u arrestua ditën e hënë më 26 tetor. Po atë ditë Becchetti doli para një gjykate në Westminister, e cila e liroi me kusht pasi la një garanci prej 50 mijë paund. Pronari i Agon Channel ndodhet në arrest shtëpie mes orës 11pm deri në 5am. Ai ka dorëzuar pasaportën në polici dhe nuk lejohet të largohet nga Britania.
Autoritetet shqiptare e kërkojnë 49-vjecarin italian për mashtrim dhe pastrim parash. Kompanitë e tij në Shqipëri, përfshi edhe televizionin Agon Channel janë konfiskuar nga Prokuroria. Për këto akuza ai rrezikon një dënim prej 15 vitesh burg. Por biznesmeni italian i mohon të gjitha dhe thotë se ato nuk janë të paligjshme.
Në një deklaratë të klubit Leyton Orient, thuhet se “sigurisht që nuk është marrë asnjë vendim në lidhje me ekstradimin e Beecchettit në Shqipëri. Avokatët besojnë se rasti i tij është jashtëzakonisht i fuqishëm. Kërkesat e palës shqiptare nuk do të ndikojnë në rolin e tij si president i Leyton Orient. Përkundër kësaj situate Francescoo Becchetti është duke punuar shumë për ripërtëritjen e klubit”.
Daily Mail shkruan se autoritetet shqiptare kanë lëshuar urdhër arresti edhe për nënë e Becchettit, Liliana Condomittin, e cila zotëron 60% të aksioneve të Leyton Orient. Në vijim të deklaratës së klubit thuhet Beccheti beson që qendrimi kritik i Agon Channel ndaj qeverisë së tij kanë cuar në ngritjen e akuzave.
“Agon Channel është një transmetues që mbron lirinë e fjalës, ndërsa gazetarët janë penguar për të marrë pagat e tyre”, vijon deklarata.
Po kështu përmendet edhe skandali me kartat e identitetit të falsifikuara, që u zbulua nga Agon Channel, ngjarje që coi në nisjen e konfliktit me qeverinë. Seanca e ardhshme gjyqësore për Francesco Becchettin do të mbahet në Wenstminister më 7 dhjetor, ndërsa ka pak gjasa të ndodhë gjë deri vitin tjetër./Marrë me shkurtime nga Daily Mail/ LA
PSI.AL/
