Presidenti i Republikës, Bajram Begaj ka uruar popullin e Kosovës me rastin e 26-vjetorit të Çlirimit.
Përmes një postimi të publikuar në rrjetet sociale, Begaj thekson se kjo ndërhyrje ndaloi masakrat çnjerëzore dhe spastrimin etnik kundër popullsisë civile që po ndodhte në zemër të Evropës.
Begaj nderoi gjithashtu luftën heroike të Ushtrisë Çlirimtare të Kosovës dhe shprehu mirënjohje ndaj aleatëve dhe partnerëve ndërkombëtarë që kontribuuan në çlirimin dhe ndërtimin e shtetit të Kosovës.
“Gëzuar Ditën e Çlirimit, Kosovë!
26 vjet më parë, trupat paqeruajtëse, të udhëhequra nga NATO, hynë në Kosovë, duke ndalur masakrat çnjerëzore dhe spastrimin etnik kundër popullsisë civile që po ndodhte në zemër të Evropës.
Sot nderojmë luftën heroike të UÇK-së dhe falënderojmë aleatët dhe partnerët ndërkombëtarë që i dhanë fund një prej faqeve më turpëruese të historisë moderne të njerëzimit dhe mbështetën më tej ndërtimin e shtetit dhe institucioneve të Kosovës.
Shqipëria do të jetë gjithnjë në krah të Kosovës, besimplotë në të ardhmen e përbashkët evropiane!”, shkruan Begaj.
