Kreu i Partisë Demokratike, Sali Berisha këtë të hënë ka hedhur akuza në drejtim të qeverisë për ndërtimin e portit të ri të Durrësit.
Në një deklaratë për mediat nga selia blu, Berisha tha se Rama dhe kompania që do të bëjë ndërtimin po përvetësojnë mbi 1 mln metër katror truall për ndërtime.
“Rama dhe kompania e tij përvetësojnë mbi 1 mln metër katror truall për ndërtime
Informoj qytetarët shqiptarë se nga ky vendim korruptiv, antiligjor i Edi Ramës, Rama dhe kompania e tij përvetësojnë mbi 1 mln metër katror truall për ndërtime, baraz kjo me rreth 3 miliardë euro.
Në këtë aferë, me pasoja të rënda strategjike për vendin, me pasoja të rënda që synojnë defaktorozimin e Shqipërisë dhe rolit të saj strategjik në transportin e BE dhe NATO, Edi Rama parashikon me makinerinë e mashtrimit të tij, investime prej 2 miliardë eurosh në marinën turistike.
Njeriu që ka marrë përsipër këtë investim, parashikonte një investim prej 4 miliardë eurosh në Serbi, dhe përfundoi me një investim prej 20 milionë eurosh.
Dëmi është i pallogaritshëm sepse me këtë lëvizje, taksapaguesit shqiptarë gjobiten me një së paku 1 miliard euro, që sipër Edi Ramës do përdoren për ndërtimin e Portit të ri në Porto Romano”-tha Berisha.
Më tej Berisha i kërkoi Bashkimit Europian të nisë një hetim rreth asaj që e cilësoi aferë korruptive e portit të Durrësit.
“I kërkoj Edi Ramës që të heqë dorë nga përpjekjet për ndërtimin e Dubait të familjes së tij në Durrës. E garantoj që ajo nuk do mund të ndodhë dhe i kërkoj Al Alabarit të heqë dorë dhe të mos përdoret nga kryeministri më i korruptuar në të gjithë kohërat në Shqipëri. I kërkoj BE të nisë një hetim rreth aferës korruptive të portit të Durrësit dhe të bëjë gjithçka që ky port të mbetet port strategjik i rajonit dhe BE-së”-tha Berisha./Opinion.al
