Vendet anëtare të BE-së do të vendosin vetë nëse do të eksportojnë pajisje mjekësore në vendet e Ballkanit Perëndimor, u shpreh zëdhënësi i Komisionit Evropian, Eric Mamer.
“Eksportet mund të autorizohen dhe pajisjet mund të eksportohen në atë rajon”, thotë Mamer, duke shtuar se nuk duan ta quajnë vendimin “ndalim të eksportit”.
Komisioni Evropian vendosi të dielën të kufizojë eksportet e pajisjeve mjekësore jashtë BE-së në mënyrë që “të mbrojë disponueshmërinë e furnizimeve të pajisjeve të tilla brenda tregut të vetëm të BE-së”.
Vendimi për të kufizuar eksportin e pajisjeve mjekësore do të jetë i vlefshëm për 6 javët e ardhshme. Shumica e vendeve anëtare të BE-së janë duke u përballur me një numër në rritje të të infektuarve me koronavirus.
Organizata Botërore e Shëndetësisë ka deklaruar më herët se Evropa është tashmë epiqendra e virusit që shpërtheu fillimisht në Kinë./Opinion.al
