Bashkimi Europian i ka bërë thirrje Greqisë që brenda tre muajve të korrigjojë mungesat në ruajtjen e kufirit të jashtëm. Në rast të kundërt Komisioni paralajmëron se hapet rruga për venhdosjen e kontrolleve në brendësi të zonës Shengen, çka sipas analistëve grekë do të thotë pezullim i Greqisë nga marrëveshja Shengen.
Këshilli Europian miratoi të premten një rekomandim ku i propozon Greqisë veprime korrigjuese për të eliminuar këto mangësi.
Rekomandimi përfshin fusha të tilla si procedurat e regjistrimit, mbikëqyrjen e kufirit detar, procedurat e kontrollit kufitar, analizën e riskut, trajnimin e burimeve njerëzore, infrastrukturën e pajisjet dhe bashkëpunimit ndërkombëtar.
Rekomandimi vbë gjithashtu në dukje se Greqia ka marrë një sërë masash për menaxhimin e situatës, por thekson se nevojiten edhe më shumë përpjekje. Funksionimi i hapësirës Shengen është në rrezik serioz. Vështirësitë me të cilat po përballet Greqia mund të kenë impakt për gjithë BE-në, prandaj duhen trajtuar kolektivisht, vihet në dukje në njoftimin për shtyo të lëshuar në Bruksel.
Në Athinë, ministri i emigracionit, Janis Muzalas, tha se në pikëpamje ligjore, nuk parashikohet dalja e një vendi nga zona Shengen. Por ekziston rreziku që vende fqinje të mbyllin kufijtë me Greqinë, çka do të bënte që të mbeteshin në Greqi mijra emigrantë dhe refugjatë, të cilët aktualisht kalojnë nëpërmjet Maqedonisë për në vende të tjera të Europës.
ABC News
