Bashkimi Evropian do kërkojë nga Kosova që në dy vitet e ardhshme të raportojë për personat e kthyer nga Siria, si dhe për procesin e rehabilitimit të tyre.
Përmes një marrëveshjeje, të nënshkruar mes Kosovës dhe BE-së, Brukseli ka detyruar autoritetet e Prishtinës që të adresojnë sfidat e paraqitura nga kthimi i luftëtarëve të huaj dhe anëtarëve të familjeve të tyre. Proces që përfshin hetimet dhe ndjekjet penale të veprave të kryera nga luftëtarët e huaj, deri tek rehabilitimi i tyre.
Sipas marrëveshjes, Kosova duhet të shkëmbejë informacione me shtetet anëtare të BE-së për luftëtarët e huaj që kthehen në Kosovë.
Po ashtu, marrëveshja parashikon që të bëhen analiza të vlerësimit të kërcënimit nga terrorizmi në Kosovë dhe koordinim më i mirë i mekanizmave për parandalimin e ekstremizmit të dhunshëm, si dhe ndërtimin e kapaciteteve për të luftuar pastrimin e parave dhe financimin e terrorizmit.
Këto objektiva janë pjesë e Planit të Përbashkët të Veprimit Kundër Terrorizmit për Ballkanin Perëndimor, që u nënshkrua nga Ministrat e Brendshëm të Ballkanit Perëndimor më 5 tetor 2018 në Tiranë.
Kujtojmë se në prill të këtij viti, në Kosovë janë kthyer 110 qytetarë nga Siria. Katër prej tyre ishin luftëtarë të huaj, 74 fëmijë dhe 32 gra, ndërsa në Siri vazhdojnë të mbesin edhe dhjetëra qytetarë të Kosovës./Opinion.al
