Brukseli ndjek hap pas hapi zhvillimet në Shqipëri ndërsa vijon tu kërkojë palëve që debatin politik ta zhvillojnë brenda parlamentit. E pyetur për atë që po ndodh në Tiranë, Maja Kocijancic zëdhënësja e shefes për politikë të jashtme në Bashkimin Evropian Federika Mogerini tha se vendit i duhet dialog.
“Siç edhe besoj që keni ndjekur zhvillimet në vendin tuaj, që në fillim të bojkotit ne kemi shprehur keqardhje sepse ne besojmë se debati politik nuk duhet të zhvillohet jashtë, por brenda parlamentit. Për ne është çështje kyçe dhe e rëndësishme që të ketë dialog mes pozitës dhe opozitës edhe për ambiciet që ka vendi për t’iu bashkuar Bashkimit Evropian. Dhe sigurisht që përgatitja e zgjedhjeve janë pjesë e rëndësishme e këtij procesi. I kemi ndjekur nga afër zhvillimet, ju e thatë edhe vetë se afati për regjistrim përfundon sot. Për ne është shumë e rëndësishme të shohim një përgatitje të mirë për një proces të drejtë zgjedhor më vonë gjatë këtij viti”.
Më herët edhe ambasadorë të Gjermanisë dhe Austrisë kanë kërkuar kthimin e opozitës në parlament dhe nisjen e dialogut mes palëve. Opozita shprehet e vendosur në kushtin e saj për qeveri teknike që do të garantojë zgjedhje të lira dhe të ndershme.
Tv Klan
