Studiuesit në Institutin e Dialogut Strategjik (ISD) me qendër në Londër thonë se kanë zbuluar një bibliotekë të madhe dixhitale të drejtuar nga grupi ekstremist Shteti Islamik (IS), sipas shërbimit publik britanik BBC.
Koleksioni i materialit në internet, i quajtur “Califhate Cache”, thuhet se përmban më shumë se 90.000 artikuj dhe ka 10.000 vizitorë unikë çdo muaj, por mbyllja e tij është e vështirë sepse të dhënat nuk ruhen në një vend.
Studiuesit e ISD-së i thanë BBC se përmbajtja përfshin dokumente dhe video në nëntë gjuhë të ndryshme dhe ofron informacion mbi sulmet, përfshirë ato në Shtetet e Bashkuara më 11 shtator 2001.
Materiali gjithashtu përfshin tekste fetare dhe përmban propagandë se si duhet të duket stili i jetës, sipas Shtetit Islamik.
Ekspertët zbuluan bibliotekën në internet pas vdekjes së udhëheqësit të ISIS-it, Abu Bakr al-Bagdadi në tetor të vitit 2019 dhe që atëherë kanë studiuar se si evoluon, si administrohet dhe kush po e viziton atë.
“Ka gjithçka që ju duhet të dini për të planifikuar dhe kryer një sulm,” tha nëndrejtori i ISD Moustafa Ayad, i cili zbuloi arkivin. “Gjërat që në thelb ju mësojnë se si të jeni një terrorist më i mirë.”
Shumica e atyre që vizitojnë këtë faqe janë meshkuj 18 deri në 24 vjeç që jetojnë në botën arabe, thanë ata.
Çdokush mund të ndajë përmbajtjen, përmes serverave të vendosur në shumë vende, duke penguar çdo përpjekje për ta mbyllur atë.
Një teknikë tjetër për të promovuar materiale nga memoria e fshehtë bëhet përmes llogarive të vjedhura që janë të lidhura me njerëz të famshëm dhe atletë.
Në një rast, grupi ISIS arriti të vjedhë llogarinë e ekipit kombëtar anglez të ragbit për ta ndjekur një të vetin duke u maskuar si një tifoz.
ISD gjithashtu ka zbuluar se bibliotekat më të vogla në internet që i përkasin grupeve të tjera ekstremiste ishin të pranishme dhe gjithashtu po përhapnin të dhëna nëpër një sistem të decentralizuar.
Studiuesit e saj kanë njoftuar policinë britanike dhe Zyrën e Prokurorit të SHBA-së për rrethin Lindor të Nju Jorkut, e cila ndjek çështjet e antiterrorizmit.
