“The Travel Show”, një nga programet e BBC që eksploron destinacione të ndryshme, këtë herë është ndalur në Shqipëri. Në një video të shkëputur, prestigjiozja britanike i ka kushtuar një hapësirë Butrintit.
“Diktatori komunist Enver Hoxha e izoloi Shqipërinë nga pjesa më e madhe e botës përgjatë regjimit të tij duke e kthyer në vendin më të varfër të Europës. Pas vdekjes së tij më 1985, vendi i është ribashkuar pjesës ndërkombëtare dhe tani është në krye të “Destinacioneve që duhen parë” për udhëtarët”, shkruhet në përshkrimin e videos.
“Pas 40 vitesh, gazetari Qasa Alom udhëton në vendin tashmë demokratik për të eksploruar qytetin e lashtë të Butrintit. Siti i parë në Shqipëri që është futur në listën e Trashëgimisë Botërore të UNESCO-s”.
Videoja tregon sesi gazetari përshkon rreth 300 km nga Tirana në Butrint që ai e përshkruan si “një nga qytetet e lashta më të mirëruajtura të Mesdheut”.
Alom thotë se ka qenë në Pompei e Athinë, por kurrë s’ka parë një foto të këtij vendi që duhet të jetë “një nga margaritarët e fshehtë” të Shqipërisë.
Ai ndalet te pjesa e teatrit duke u shprehur i mahnitur: “Sa qytetërime? Qofshin osmanët, qofshin romakët, e kanë përdorur këtë hapësirë dhe është ndërtuar në një formë ku e ndiej zërin tim të jehojë”, shpjegon Alom duke e demonstruar.
Ai takohet me Ani Taren, drejtorin e Parkut Kombëtar të Butrintit për ta pyetur se çfarë e bën kaq të veçantë këtë vend.
“Këtu mund të shohësh të gjitha qytetërimet e Mesdheut që vijnë, ikin dhe jetojnë. Përgjatë historisë, Butrinti ka pasur në njëfarë mënyre, lidhje me historitë e rëndësishme të Mesdheut”.
Në vitin 1992, Butrinti ishte vendi i parë që u rendit në listën e Trashëgimisë Botërore të UNESCO-s duke ruajtur historinë e pasur kulturore që shtrihet përtej hijeve të ngjarjeve të shekullit të kaluar.
Gazetari dëshmon mrekullinë e bazilikës së Butrintit që siç i shpjegon Tare, është një nga më të mëdhatë e llojit të saj në Ballkan, e ndërtuar nga perandori Justinian që njihet edhe për Shën Sofinë e Kostandinopojës.
I habitur që ky vend është i ruajtur mirë, Alom njihet me faktin se Butrinti është restauruar në shek. XIV-XV për shkak të një tërmeti. “Së fundmi kemi zbuluar se kjo është ndërtuar mbi një banjë romake”, shton Tare.
Ai i shpjegon gazetarit se në 30 vitet e fundit sfida kryesore ka qenë mbrojtja e parkut nga neglizhenca. “Në vitet 2000, pas luftës së Kosovës organizuam nnjë festival të lashtë drame këtu. Këtu ku ne jemi ulur, vinin në fillim njerëzit. Ata ishin të zhurmshëm. Hanin fara. S’e kuptonin ç’po ndodhte. Dhe vidhnin shiltet. Në pesë vite, vendasit vinin këtu të veshur bukur. Askush nuk bënte zhurmë. Të gjithë e respektonin teatrin. Askush nuk vidhte jastëkë. Në 5 vjet. Pse? Sepse kultura i ndërgjegjësoi dhe u dha një ndjesi krenarie”, përfundon Tare duke theksuar sa e rëndësishme është që Butrinti të simbolizojë pikërisht këtë për vendin.
