Drejtori i Klan Kosova, Baton Haxhiu ka bërë një panoramim të situatës në Kosovë, pas rezultatit të së dielës. Në një lidhje direkte në emisionin Opinion, Baton Haxhiu tha se fitorja e Vetëvendosjes nuk ishte një surprizë.
“Jo nuk ishte surprizë, ishte një pritje për arsye se kjo votë refuzuese ndaj pushtetit ka ndodhur edhe zgjedhjet e kaluara por atëherë u bë një koalicion i madh dhe dallimi mes koalicionit dhe Vetëvendosjes ishte vetëm disa mijëra vota dhe se aty ishin shumë parti politike. Nëse do kishte garë vetëm mes partive politike do të fitonte ose LDK, ose VV”, tha Baton Haxhiu.
“Unë jam i lumtur që Albin Kurti dhe Vetëvendosje të mos jenë opozitarë më, miti i i opozitarizmit të VV nuk do të jetë më prezent në Kosovë. Ata do ti provojnë duke u futur në qeveris. Albin Kurti për gati se 12 vite ka qenë opozitar, ai ka treguar një vazhdimësi të rrugës së tij politike. Gjatë 5 viteve të fundit, ka pasur 5 çështje që ka reaguar, ka gjuajtur gaz lotsjellës, pastaj ka qenë i ashpër, duke bërë dhe gjëra që kanë qenë jashtë ligjit. Tani e tutje do ballafaqohet me gjëra që ka kritikuar dhe nëse nuk ka kreativitet për të gjetur zgjidhje për asosacionin, mundësinë e ndryshimit të kufijve, me veriun e Kosovës…”, theksoi më tej Drejtori i Klan Kosova.
Por cilat janë mundësitë që kreu i Vetëvendosjes Albin Kurti të krijojë një koalicion qeverisës?
“Albin Kurti e ka vetëm një rrugë, vetëm LDK për arsye se ai duhet të ketë 60 vota shqiptare që të mos varet nga lista serbe. Për 60 vota shqiptare mundësitë për një gjë tjetër janë të kufizuara. Kadri Veseli ka thënë se do të dalë në opozitë, atëherë e vetmja rrugë dhe e vetmja marrëveshje është LDK”, tha Baton Haxhiu.
Sipas tij LDK-në e drejton Isa Mustafa dhe negociatat do të jenë vetëm me të.
“Unë mendoj që LDK e ka bërë të ditur edhe po të fitonte Vjosa Osmani, kryetari Isa Mustafa do të negocionte me Albin Kurtin. Negocimi do t’i takojë vetëm zotit Isa Mustafa. Nëse LDK refuzon që të hyjë në koalicion, varianti që VV të bëjë koalicion me AAK dhe PSD është i pamundur. Do të ishte i pamundur për faktin se zoti Haradinaj e ka të ngulitur tezën që nuk mund të hiqet taksa, ndërsa Albin Kurti ka paralajmëruar që do të bëjë ato gjëra që ka refuzuar ti bëjë Haradinaj”, tha drejtori i Klan Kosova./ Opinion.al
