Gazetari i njohur Baton Haxhiu është dorëhequr nga drejtimi i televizionit Klan Kosova. Përmes një letre publike, Haxhiu njofton largimin e tij nga televizioni që ai vetë e drejtoi për disa vite duke e kthyer në mënyrë të padiskutueshme në ekranin më të ndjekur në Kosovë. Përmes letrës gazetari i njohur falenderon të gjithë bashkëpunëtorët, ndërsa lë të kuptohet se ai tashmë do të ndërmarr një sfidë tjetër, pasi sikurse shprehet tashmë kishte mbërritur në cak.
Duke e konsideruar Klan Kosovën si pjesën më të bukur të karrierës së tij, Haxhiu megjithatë nuk zbulon asnjë detaj për angazhimin e tij të ri.
Letra e plotë
Jetën time nuk e paramendoj pa sfida të mëdha.
I kërkoj, por edhe më gjejnë. S’ua kam frikën.
E kam kuptuar moti: sfidat profesionale më mbajnë gjallë në gazetari. Ato u japin energji ditëve të mia të punës, me lumturi dhe mërzi, mirësi e zhgënjime.
Në gazetë ditore, revistë javore, ose në studio televizive – esenca mbetet e njëjtë. Ta them atë që mendoj se duhet të thuhet, të kërkoj përgjigje, të kontribuoj në sferën publike. Të bashkëpunoj me njerëzit dhe profesionistët më të mirë.
Më shumë se 30 vjet kështu. Dhe Klan Kosova. Klan Kosova është pjesa më e bukur e karrierës sime.
Fillime idealiste me paqartësi e pasiguri, duke parë e duke bërë, me pasion, entuziazëm dhe vullnet të pakrahasueshëm me cilindo projekt tjetër medial kosovar në dekadat e fundit.
Energji fantastike e djemve dhe vajzave që u shndërrua në uragan kreativ. Çdo ditë rriteshim dhe ndryshonim për të mirë në hapësira të vogla me shumë ide.
Sot është krejt ndryshe.
Liderizmi i Klan Kosovës në skenën mediale, investimi në gjenerata të reja, ndërtimi i modeleve të reja të gazetarisë dhe stabiliteti i përgjithshëm janë arritje për mburrje dhe krenari. Për mua dhe për të gjithë që kanë qenë pjesë e tij.
Njëkohësisht, janë shenjë e qartë që ky cikël është përmbyllur. Kam arritur në cak.
Më duhet të lëviz. Drejt një adrese të re, një sfide tjetër.
Nuk e kam të lehtë, por e këtillë është jeta ime. Ky jam unë.
Jemi Një.
Përjetësisht.
Me dashuri,
Batoni. / Opinion.al
