Kompanitë e basteve favorizojnë shumë Ukrainën para përballjes të së dielës me Kosovën. Ndeshja luhet në terren neutral, përkatësisht në Krakovë të Polonisë, pasi Ukraina nuk e njeh shtetin e Kosovës. Kuota për fitoren e Ukrainës është 1.22, ndërsa për fitoren e Kosovës është 11.50. Për barazim, kuota është 6.00.
Por në kampin ukrainas nuk e nënvlerësojnë assesi Kosovën, megjithëse Kosova të enjten e pësoi thellë 6-0 nga Kroacia në Shkodër. Trajneri i Ukrainës, Andrij Shevçenko, ka thënë se Kosova mbetet kundërshtare e fortë.
“Besoj se lojtarët tanë nuk do të nënvlerësojnë këtë ekip. U kam thënë djemve që të harrojnë ndeshjen me Turqinë dhe të përgatiten për ndeshjen tjetër. Jemi të vetëdijshëm se sa e rëndësishme është ndeshja e Kosovës për ne. Në të njëjtën kohë jemi të vetëdijshëm se sa shumë jemi shpenzuar në ndeshje me Turqinë. Kosova nuk është kundërshtare e lehtë, megjithëse humbi 6:0. Ndeshja si ndeshje nuk është dukur kështu”, tha dje Shevçenko.
