Bashkim Fino ka propozuar sot në sallën e Parlamentit që Partia Socialiste të tërheqë listat e dorëzuara në KQZ me emrat e komisionerëve për zgjedhjet e 30 qershorit dhe këto të zëvendësohen me persona jo-politikë.
Në fjalën e tij, deputeti socialist ka thënë se s’mund të pritet një marrëveshje e minutës së fundit që do të kthejë opozitën në Parlament.
“S’mund të presim që një marrëveshje e orës së fundit do kthejë opozitën në Parlament. Ne duhet të flasim për një proces të rregullt dhe demokratik. Vlerësoj daljet e rregullta nga përfaqësuesit e KQZ-së për t’u bërë thirrje partive që të dorëzojnë informacionet pranë KQZ-së”, është shprehur Fino, duke nxitur që Komisionit Qendror të Zgjedhjeve t’i jepet mbështetja maksimale.
Ish-kryeministri ka thënë se sfida kryesore për Partinë Socialiste është procesi dhe jo rezultati i zgjedhjeve, ndaj ka propozuar tërheqjen e komisionerëve politikë.
“Për PS kjo është sfida më e madhe, jo për rezultatin, por për procesin që do të dalë ky rezultat. Propozoj që PS të tërheq listat e dorëzuara në KQZ, administrata zgjedhore të jetë e përbërë nga individë të lirë dhe të barasvlershëm nga partitë politike. Ky do të ishte një sinjal i pastër për spektrin politik, sepse ata nuk na tërheqin dot zvarrë, por sulmi i tyre behet ndaj sistemi zgjedhor”, tha Bashkim Fino./Opinion.al
