TIRANË- Shfaqja e qenve endacakë në çdo rrugë të Tiranës është e frikshme, por kurrë nuk do ta mendonim se janë rreth 10 mijë të tillë sot në kryeqytet. Bashkia e Tiranës jep shifrën alarmante por thotë se për momentin nuk mund të bëjë asgjë. Deri në miratimin e buxhetit të bashkisë për vitin 2016 qentë do të vazhdojnë të shumohen dhe kërcënojnë seriozisht jetën tonë.
Me interesimin e Opinion.al, Agjencia e Mbrojtjes së Konsumatorit pranë Bashkisë së Tiranës, informon se në muajin nëntor u bë numërimi sipas një metodoligjie të përcaktuar ku rezultoi se janë rreth 9 600 qen endacakë. “Numërimi u bë në mënyrë që t’i paraprijmë projektit për trajtimin e qenve të rrugës”, thuhet në njoftimin e AMK për Opinion.al.
E pyteur për mënyrën se si do të ndërhyhet për largimin e qenve nga rruga, AMK sqaron se “aktualisht jeni në fazën e hartimit të projektit dhe duke qenëse nuk duam që ai të jetë sipërfaqësor, po parashikojmë çdo vështirësi të mundëshme që mund të sjellë zbatimi”.
Lidhur me metodën që do të përdoret për largimin e qenve nga rruga, AMK thotë se “e sigurt është se nuk do t’i vrasim ata”. Veterenerët e kësaj agjencie do të bëjnë procesin e sterilizimit, vaksinimit dhe matrikullimin të qenëve endacakë për të vijuar më pas, në një fazë të dytë, krijimin e strehëzës për ta.
Pra siç shihet, kemi pak shpresa për ndërhyrje urgjente. Bashkia ia vë fajin paraardhësve që nuk ka bërë asgjë në këtë drejtim. Aktualisht po hartohet plani, më pas me miratimin e buxhetit (vitin e ardhshëm) nis faza e trajtimit të qenve.
AMK sqaron se “projekti do të nisë me fondet e Bashkisë së Tiranës, pas miratimit të buxhetit dhe më tej do të aplikohet për projekte pranë BE-së, pasi kjo është një punë e kushtueshme”.
