Këshilli Bashkiak i Tiranës votoi të mërkurën përgjysmimin e taksës së ndikimit në infrastrukturë për atë që e quajti, pallate në qendër me destinacion “zyra”, me kushtin që sipërfaqja e pallateve përfituese “të mos i kalojë 30 mijë metrat”, ndërsa dha një listë me zonat ku mund të ndërtohen pallate të tilla, përfshirë bllokun e kryeministrisë dhe piramidën, zona ku gjithsesi nuk pritet të ndërtohen pallate.
Vendimi, i cili u votua nga shumica e Këshillit Bashkiak kontrolluar nga Partia Socialiste dhe këshilltarë të partive të tjera që mbështesin shumicën, është propozuar nga vetë kryetari i Bashkisë Erion Veliaj.
Vendimi për një ndryshim të vendimit 59 datë 30.12.2015″ thotë: “Për ndërtimet e reja për qëllime zyrash, sipas njësive strukturore të përcaktuara në Aneksin 1 që i bashkëligjet dhe është pjesë përbërëse e këtij vendimi, taksa e ndikimit në infrastrukturë është në masën 4% të çmimit për shitje për metër katror.”
Gjithsesi, vendimi ka një pikë të dytë, e cila thotë: “Taksa e përcaktuar sipas pikës 1 të këtij vendimi, qëndron në fuqi dhe zbatohet për aq kohë sa ndërtimet e reja për qëllime zyrash nuk tejkalojnë sipërfaqen prej 30 000 (tridhjetëmijë) metra katrorë”.
Problemi është se 30 mijë metra katrorë është sipërfaqja tipike e një pallati të madh ose sipërfaqja tipike e dy pallateve mesatare dhe kjo do të thotë se jo të gjitha pallatet që do të ndërtohen me destinacion “zyra” do të mund të përfitojnë nga përgjysmimi i taksës së ndikimit në infrastrukturë. Nga ky përgjysmin do të përfitojë minimumi 1 dhe maksimumi 2 pallate.
Kullat në qendër të Tiranës shiten mesataritsht me 2 mijë euro për metër katror. Vendimi i bashkisë pë të përgjysmuar taksën për 30 mijë mëtër katror ndërtim do të sillte një falje taksash prej 2.4 milionë euro.
Bashkia e Tiranës nuk iu përgjigj pyetjeve të BIRN se si do të mund të zgjidhet projekti që përfiton ulje në rast se në bashki paraqiten më shumë se dy kërkesa për ndërtime të reja me destinacion “zyra”.
Vendimi i Këshillit Bashkiak jep gjithashtu edhe një listë me zonat e Tiranës ku mund të ndërtohen pallate të tilla me taksë të përgjysmuar. Në këtë listë janë përfshirë zona e Bulevardit të Ri në veri të Tiranës plus zona e bllokut si dhe zona e rrugicave me vila nga Lana deri te Stadiumi “Qemal Stafa”, zonat me kod 97, 96, 95, 21 dhe 22.
Në hartë si zona të mundshme përfituese janë vendosur edhe zona e ish-bllokut, e cila sakaq është e mbindërtuar dhe me pak hapësira për ndërtime të reja shumëkatëshe. Por gjithashtu në këtë hartë janë përcaktuar si përfituese të mundshme blloku 202, ku përfshihet Piramida dhe ndërtesa e Kryeministrisë si dhe blloku 194, ku përfshihet Hotel Rogner dhe Pallati i Kongreseve. Bashkia e Tiranës nuk iu përgjigj pyetjes me email të BIRN se pse në listën e përfituesve janë përfshirë edhe këto zona ku nuk pritet të ndërtohen pallate të reja.
Bashkia e Tiranës zemëroi ndërtuesit në vitin 2015 kur me vendimin 59 pothuajse e katërfishoi taksën e ndikimit në infrastrukturë të ndërtimeve të reja. Kjo taksë është konceptuar si e tillë që ndihmon bashkitë të kompensojnë dëmet që pëson infrastruktura publike si rrugët, apo nevoja për zgjerimin e shërbimeve publike në kanalizime dhe ujë në rast ndërtimesh të reja.
Më herët, kjo taksë ishte në masën 4% të kostos së investimit, gjë që do të thotë se ndërtuesit paguanin 4 për qind të kostos së përafërt prej 30 mijë lekë për metër katror. Bashkia e rriti atë në 8 për qind të çmimit të shitjes, i cili zakonisht është dy-pesë herë më i lartë se sa kostoja e ndërtimit. Ndërtuesit u ankuan në atë kohë se vendimi i bashkisë efektivisht e rrit koston e ndërtimit në Tiranë me 50-100 euro për metër katror, gjë që nga ana e saj, sjell një rritje po kaq dramatike në çmimet e apartamenteve që paguajnë konsumatorët./Gj.Erebara/
Burimi: BIRN
