Afro 1 000 punonjës të Bashkisë së Lezhës kanë 3 muaj pa marrë rrogat. Sakaq, mësohet se njësitë administrative kanë edhe më shumë, deri në 5 muaj pa shpërndarë paga.
Pas ankesave të disa punonjësve, Opinion.al kontaktoi kryetarin e djathtë të Bashkisë së Lezhës, Fran Frrokaj, i cili premtoi se deri në fund të kësaj jave do të dalin rrogat për punonjësit. “Kam marr konfirmim nga Thesari i Shtetit që të përdor disa burime të ardhurash. Ndërmjet datave 8-10 Dhjetor do të shpërndaj pagat”, tha ai.
Sipas tij për punonjësit e thjeshtë do dalin dy paga njëherësh, ndërsa për drejtorët 1 pagë.
Por çfarë ka ndodhur me financat e Bashkisë? Fran Frrokaj thotë se Bashkia e Lezhës kishte trashëguar nga kryetari i mëparshëm i LSI, Viktor Tusha, një borxh të madh prej 5.2 miliardë lekësh.
“Thesari dhe Përmbarimi më kanë mbajtur këtë vit 2.6 miliardë lekë, ose gjysmën e buxhetit të bashkisë për të shlyer detyrimet e prapambetura. Shto këtu faktin se lejet e ndërtimit ishin të bllokuara. Pra nga njëra anë nuk kam patur të ardhura dhe nga ana tjetër kam shlyer borxhet”, shprehet kryebashkiaku.
Ai pranon edhe fryrjen në administratën e bashkisë. “Kam bërë shkurtime, 150 vetë largohen tani në dhjetor dhe 150 të tjerë në janar”, deklaron Frrokaj.
/Opinion.al
