Aktualitet

Bashkia e Kukësit padi penale për anëtarët e KZAZ


               Publikuar në : 15:49 - 24/06/19 |
Al Do

Bashkia e Kukësit ka ngritur padi ndaj anëtarëve të KZAZ Kukës duke i akuzuar se po “mbajnë të bllokuar me forcë ambientet në pronësi të Bashkisë”. Sipas Bashkisë anëtarët e KZAZ nr.11 në Kukës po shpërdorojnë detyrën duke mbajtur të bllokuar në mënyrë të paligjshme, mjediset në Shkollën e Mesme “Havzi Nela”.

Argumenti i kryebashkiakut Shehu është se “pavarësisht se anëtaret e KZAZ-së kanë marrë dijeni për shkak të detyrës, për anullimin e datës së zgjedhjeve vendore, ata vijojnë të mbajnë të bllokuar një objekt në pronësi të Bashkisë Kukës”.

Pas daljes së dekretit të presidentit për anulimin e datës së zgjedhjeve, anëtarët e KZAZ-së Kukës i lëvizën materialet zgjedhore nga mjediset e Qendrës Kultutore “Hasan Prishtina”, por vazhdojnë të mbajnë të bllokuar palestrën sportive të shkollës së mesme “Havzi Nela”, në kundërshtim me ligjin.

Bashkia Kukës, duke vlerësuar se çdo veprim i ndërmarrë në kundërshtim me Dekretin e Presidentit gjykohet si shkelje e legjislacionit penal dhe kërkon procedimin penal të anëtarëve të KZAZ-së Kukës, për shpërdorim detyre, sipas nenit 248 të Kodit Penal.

Në nenin 248 të Kodit Penal ndër të tjera thuhet se kryerja ose moskryerja me dashje e veprimeve ose mosveprimeve në kundërshtim me ligjin, që përbën mospërmbushje të rregullt të detyrës, nga personi që ushtron funksione publike dënohet me burgim deri në shtatë vjet dhe me gjobë nga treqind mijë deri në një milionë lekë.

Ndërkohë që mësohet se Bashkia Devoll i ka dërguar një letër Komisionit Qëndror të Zgjedhjeve ku kërkon revokimin e vendimit për caktimin e qendrave të votimit. Ata thonë se nuk do të lejohet futja e materialeve zgjedhore në qendrat e votimit, vendim që shkon konform me dekretin e presidentit. /Opinion.al

Pas