Bashkëshortja e Agim Arapit, i cili humbi jetën më 11 prill të vitit 2017 pas një konflikti me Jurgen Kurtin dhe dy vëllezërit Konstandin dhe Kujtim Ekonomi ka thënë se nuk ka lidhje me vrasjen e mbrëmshme në Tiranë.
Vjollca Arapi, në një prononcim për “Balkanweb”, thotë se ka kërkuar drejtësi për vrasjen e bashkëshortit të saj, ndërsa ngushëllon edhe nënën e Jurgen Kurtit.
“E dëgjova ne media për vrasjen. Me erdhi keq se ishte djalë i ri. Keqardhje për nënën e tij që i iku djali dhe i them nënën se tij se unë s’kam lidhje me atë ngjarje. Unë kam kërkuar burgun, drejtësinë, jo vdekjen e tij. Prokuroria e Tiranës erdhi dje në banesën time dhe bëri kontroll. Më morën në pyetje, por unë nuk di gjë për vrasjen dhe 3 fëmijët e mi jetojnë në Itali. Drejtësia nuk u vu në vend për bashkëshortin tim sepse u ble me para”, tha ndër të tjera bashkëshortja e Agim Arapit.
Në 11 prill të 2017, Agim Arapi, 51 vjeç humbi jetën pasi u rrah barbarisht pas konfliktit që nisi për një tub aspirimi. Konstandin dhe Kujtim Ekonomi i detyroheshin viktimës një shumë prej 13 mijë lekësh të reja. 51-vjeçari i kishte kërkuar Jurgen Kurtit paratë dhe në debat e sipër, erdhën dhe u përfshinë në konflikt edhe dy vëllezërit Konstandin dhe Kujtim Ekonomi, që e rrahën për vdekje./Opinion.al
