Këtë të dielë në rubrikën “Shihemi në Gjyq” në programin “E Diela Shqiptare” u ballafaqua një çift nga një fshat i Durrësit, të cilët jetojnë prej vitesh të ndarë për shkak të emigracionit.
Anila Bushi, ka sjellë bashkëshortin e saj Qemalin, pasi pretendon se ai nuk po kryen detyrimet familjare duke u kujdesur për qetësinë e saj dhe të tre djemve, më i madhi i të cilëve vetëm 16-vjeç.
Problem për marrëdhënien mes çiftit është bërë një tokë e blerë nga Qemali në vitin 1998 në Durrës, aty ku kanë ndërtuar edhe një shtëpi. Por Anila pretendon se vëllai i Qemalit, Sytkiu, e ka “riblerë” këtë pronë në vitin 2013 duke i paguar sërish para pronarit, nga i cili e kishte blerë edhe Qemali, dhe gjysma e shtëpisë së saj ka mbetur në pronën e Sytkiut.
Në këtë mes Qemali thotë se nuk e hedh poshtë vëllain, dhe se çështjen do ta zgjidhë vetë në kuvendin familjar, por Sytkiu nga ana tjetër ka fituar gjyqin e shkallës së parë në rrethin gjyqësor të Durrësit.
Anila e akuzon bashkëshortin se vjen vetëm një muaj në vit, dhe të gjitha gjyqet i ka ndjekur vetë. Ndërkohë Qemali, me një gjuhë tepër të vrazhdë, i thotë bashkëshortes “ qepe gojën, e di unë se si e zgjidh me njerëzit e mi”.
“Si ta qep? Unë jetoj me 3 fëmijë, ti je emigrant. Ti 1 muaj vjen në vit. Unë përballem me vëllain tënd. Unë jetoj me fëmijët tuaj këtu. “, iu përgjigj Anila të shoqit.
Në fund seanca u mbyll me një përqafim mes çiftit! /Opinion.al
