Deputeti i ardhshëm në Kuvendin e Shqipërisë, i dalë nga zgjedhjet e 25 prillit për qarkun e Lezhës nga Partia Demokratike, Agron Gjekmakaj, i pyetur në lidhje me ftesën e kryeministrit Edi Rama për bashkëpunim me PD, tha se e vetmja gjë që mund të negociohej me qeverinë Rama, është përsëritja e zgjedhjeve në një qeveri teknike.
“Kjo nuk ndodh. E vetmja gjë e negociueshme do të ishte që të negociohej përsëritja e zgjedhjeve në një qeveri teknike për të kthyer legjimitetin institucioneve në Shqipëri. Kjo do të ishte e vetmja ofertë bashkëpunimi sot për sot me Partinë Socialiste”, u shpreh Gjekmarkaj në një intervistënë news 24.
Agron Gjekmarkaj nënvizon se Basha në zgjedhje normale, do të bëhej kryeministër.
“Kudo ka valë të madhe zemërimi. Edhe socialistët e dinë se janë blerë vota edhe brenda PS-së. Është bërë kërdia në vjedhje të votave. Njerëzit duhet të jenë vigjilent. Shteti dhe policia deri më tashmë janë bërë një që të mos dalë e vërteta. Zoti Basha ka bërë një fushatë ekselente, ka pasur program konkret të konsultuar me CDU-në gjermane dhe ka marrë shifrën më të lartë të votave, edhe se më 2009. Nuk u lejuan që të ketë zgjedhje të ndershme në Shqipëri edhe këtë herë. Sfida e Bashës dhe e PD-së është që të kthejmë zgjedhje të ndershme. I vjedhuri nuk mund të urojë hajdutin. Basha në zgjedhje normale do bëhej kryeministër”, tha Gjekmarkaj./Opinion.al
