Autoriteti për Informim mbi Dokumentet e ish-Sigurimit të Shtetit ka bërë të ditur se prej datës 2 Prill është deklasifikuar dosja me 2 fashikuj për Teatrin e Operas dhe Baletit.
Sikurse bëhet me dije nga ky autoritet, dosja ka qenë e hapur në vitin 1973 dhe ishte klasifikuar si dosje e objektit të rëndësisë së veçantë.
Kjo dosje mbulonte survejimin e strukturës së Bibliotekës Kombëtare, Pallatit të Kulturës dhe Teatrit të Operas dhe Baletit. Ajo është mbyllur më 16.03.1991.
“Rreth 78 vetë (kompozitorë, balerinë, këngëtarë, orkestrantë) punonin në Teatrin e Operas dhe Baletit, mes të cilëve, edhe bashkëpunëtorë të Sigurimit të Shtetit. 53 persona survejoheshin, sepse, sipas raporteve të Sigurimit, rezultonin me “qëndrim të keq politik”. Mes tyre, 45 survejoheshin në TOB, 6 në Bibliotekën Kombëtare dhe 2 në Pallatin e Kulturës Masive”, thuhet në një postim në Facebook të autoritetetit për informim.
Dosja mund të vihet në dispozicion të studiuesve dhe mediave, në përputhje me ligjin./Opinion.al
