Kryetari i Partisë Demokratike, Lulzim Basha ka reaguar pas takimit të zhvilluar sot në Kavajë, ku dhjetëra qytetarë e pritën duke thirr “Rama ik”.
Basha shkruan në “Facebook” se 25 prilli është një referendum kundër qeverisë “Rama”. Basha premton se do të anulojë fiskalizimin, rritjen pensioneve çdo vit 5% dhe uljen e çmimit të energjisë dhe karburantit.
Për takimin e sotëm të Bashës me qytetarët në Kavajë, reagoi dhe Policia e Shtetit e cila iu kërkoi mirëkuptim subjeketeve politike që të respektojnë masat anti-COVID.
MESAZHI I BASHËS
Sot vizitova qytetin e Kavajës ku në çdo hap dhe çdo përshëndetje, në çdo rrugë dhe çdo derë gjeta entuziazëm, padurim dhe vendosmëri për ta shndërruar 25 prillin në një referendum kundër të keqes që ka mbjellë Edi Rama prej 8 vitesh. Dëgjova prej sipërmarrësve dhe qytetarëve se qytetin e ka pllakosur mjerimi dhe zymtësia nga babëzia e korrupsionit qeveritar dhe ikja masive e rinisë.
Diskutova me qytetarët dhe sipërmarrësit planet tona të punës për të kthyer normalitetin në Shqipëri dhe për të sjellë shpresën dhe ndryshimin që i duhet kaq shumë vendit. Do të ulim taksat dhe do të heqim pengesat për të bërë biznes. Do të çlirojmë biznesin nga taksat e rënda dhe oreksi i mijëra inspektorëve. Do të anulojmë fiskalizimin dhe do të dërgojmë për ndjekje penale edhe këtë aferë të hapur korruptive. Do të rrisim pensionet çdo vit 5% dhe do të ulim çmimin e energjisë dhe karburantit. Do t’u kthejmë pronat brenda 4 viteve dhe do të krijojmë një buxhet dinjitoz për bashkësitë fetare. Kemi shumë punë që na presin për të kthyer shpresën e të rinjve tek Shqipëria, prandaj duhet të bashkohemi për të bërë të mundur ndryshimin. Më 25 prill, Rama humb dhe Shqipëria fiton!
