Kreu i Partisë Demokratike, Lulzim Basha në një postim në rrjetin social “Twitter”, ka përsëritur sërish qëndrimin e tij për nismën e propozuar nga PD, vetingun e politikanëve.
Sipas kryedemokratit, zgjidhja e krizës ekonomike dhe korrupsionit në Shqipëri është pastrimi i politikës nga të korruptuarit dhe politikanët e lidhur me krimin.
“Një shtet i kapur nga korrupsioni nuk i shërben qytetarëve, por një pakice që gjallon në kurriz të shumicës dërrmuese të shqiptarëve, ndaj edhe buxheti është në funksion të PPP-ve klienteliste, jo të familjeve dhe sipërmarrjeve të ndershme. Kjo krizë korrupsioni po varfëron qytetarët, po largon të rinjtë e të rejat dhe po asfikson ekonominë. Zgjidhja është pastrimi i politikës nga të korruptuarit dhe politikanët e lidhur me krimin. Zgjidhja është vettingu në politikë!”, shkruan Basha./Opinion.al
