Opozita zyrtarisht nuk pranon vendimin e Kolegjit Zgjedhor, që rrëzon dekretin e Presidentit Ilir Meta për anulimin e datës së zgjedhjeve lokale.
Kryetari i Partisë Demokratike, Lulzim Basha në një dalje për mediat tha se Kolegji Zgjedhor u përdor nga kryeministri Edi Rama si makinacion për të krijuar një ligjshmëri false.
“Asnjë institucion përveç Gjykatës Kushtetuese nuk mund të shprehet për dekretin e presidentit. Vendimi i sotëm dihej prej disa ditësh”, tha kreu i PD-së.
“Me veprimin e tij, Kolegji Zgjedhor sot provoi edhe një herë se vendimi ynë për të mos hyrë në këto zgjedhje farsë ishte vendim i duhur. Sjellja e kolegjit provoi se edhe dorëzimi i mandateve parlamentare ka qenë, gjithashtu, një vendim i drejtë i opozitës. Regjimi autokratiko-kriminal i Edi Ramës ka nevojë për fasadë për të mbuluar thelbin e tij. Me largimin tonë nga institucionet e kapura prej tij ne ia hoqëm këtë fasadë dhe tani të gjithë po shohim fytyrën e vërtetë të regjimit të Edi Ramës”, tha më tej Basha.
Vendimi i Kolegjit, Gjykatës më të lartë për proceset zgjedhore, ishte unanim, me një votim 5 me zero. Ai është i formës së prerë dhe ndaj tij nuk lejohet ankimim./ Opinion.al
https://www.facebook.com/lulzimbasha.al/videos/348214555843915/
