Lulzim Basha duke u bërë thirrje qytetarëve të bashkohen në protestën e 27 janarit, tha se nuk po lufton për karrigen e tij, por për drejtësinë. Sipas tij, marrëveshja e 18 Majit me Edi Ramën ka qënë një sakrificë që ka bërë për Shqipërinë.
“Ne jemi njerëzit që kemi ditur të sakrifikojmë edhe interesat tona politike dhe partiake, siç ishte marrëveshja e 18 Majit, për interes të Shqipërisë ndaj nuk shkojmë për karrigen tonë. Nuk shkojmë për të bërë Lulzim Bashën Kryeministër. Shkojmë për të çliruar shqipërinë nga krimi. Për të çliruar drejtësinë nga krimi! Për të çliruar qeverinë nga krimi, për të çliruar ekonominë nga krimi. Vetë protesta do të jetë numerikisht, shumë e shumë herë më e madhe se bashkimi i kopukëve dhe horrave e kriminelëve të Edi Ramës, ndërsa zëri i protestës, do të jetë zëri i shumicës absolute të shqiptarëve”, është shprehur Basha.
Duket se motoja e protestës do të jetë nën tingujt e John Lennon. Duke e perifrazuar Basha tha më tej:“John Lennon, me këngën e tij të famshme “War is over, if you Want it”, “Lufta mbaron po të duash ti”. Edi Rama mbaron, po të duash ti! Ky është mesazhi që do t’i japim çdo shqiptari. Po të duash ti, po të duam ne, Edi Rama mbaron! Ky është mesazhi i protestës. Po të ngrihet populli, po të bashkohen qytetarët, Edi Rama mbaron!
Deklaratat janë bërë gjatë një aktiviteti me disa degë të Tiranës dhe u përcollën për mediat nga zyra e shtypit në PD.
/Opinion.al
