Kryetari i Partisë Demokratike, Lulzim Basha ka deklaruar se celja e negociatave të Shqipërisë në Bashkimin Europian varet nga plotësimi i 9 kushteve të vendosura nga Budestagu në shtator dhe ky tashmë është edhe qëndrimi i Partisë Popullore Europiane.
Basha tha se në qendër të diskutimit mbi Shqipërinë ka qenë “mbështetja totale” e Shqipërisë për “çeljen e negociatave dhe anëtarësimin e Shqipërisë në Bashkimin Europian”.
“Theksi që kanë vendosur drejtuesit e BE edhe gjatë takimeve që kam patur ka qenë te përmbushja e kushteve nga ana e Shqipërisë, kjo nuk është një gjë e re për ne. Në shtator Bundestagu ka miratuar një rezolutë sipas të cilës Shqipërisë do ti çelen negociatat pas plotësimit të 9 kushteve. Prej ditës së mërkurë ky qëndrim është qëndrimi edhe i Partisë Popullore Europiane që është grupimi më i madh politik në Europë që ka edhe Presidenten e re të Komisionit Europian dhe numrin më të madh të eurodeputetëve në Parlamentin Europian”, tha Basha.
Sa i përket kushteve, kreu i demokratëve theksoi miratimin e Reformës Zgjedhore me vullnet politik, funksionimin e Gjykatës Kushtetuese dhe luftën ndaj korrupsionit dhe krimit të organizuar.
“Kushtet nuk lënë vend për propagandë megjithëse ajo vazhdon. Kërkesa e parë e këtij bashkimi është hartimi pa vonesë dhe miratimi i reformës zgjedhore duke vënë theksin në vullnetin politik. Së dy bërjen funksionale të Gjykatës Kushtetuese dhe vendosja mbi procesin e 30 qershorit me një vendim final dhe të prerë. Së treti papajtueshmërinë me krimin zgjedhor dhe të gjithë ata që janë përfshirë të hetohen në mënyrë të suksesshme dhe të çohen në burg. PPE kërkon zbatimin e plotë të ligjit të dekriminalizimit dhe nxit ngritjen sa më shpejtë të SPAK dhe BKH. E konsideron të pamjaftueshme luftën ndaj korrupsionit dhe krimit të organizuar.”, deklaroi kreu i opozitës. /Opinion.al
