Lulzim Basha ka treguar pse u rikthyer në skenën politike pikërisht pas zgjedhjeve lokale të 14 maijt.
Në takimin me të rinjtë në Shkodër, Basha tha se u dorëhoq si kryetar parti i PD, në mënyrë që edhe Sali Berisha të tërhiqej nga agjenda e tij për të marr drejtimin e PD.
Basha tha se edhe pse u largua, situata në PD është ende shumë e rëndë dhe se pikërisht për shkak të situatës së shkaktuar nga humbja e zgjedhjeve, vendosi që të rikthehet politikën aktive.
Basha shtoi se nuk është penduar për vendimin e marrë, sepse me të ka tejkaluar sfidën e lidershipit, që në kohë të vështira vë përpara interesin e qytetarëve, jo të tijin.
Gjithashtu Basha shtoi se e vetmja mënyrë për të shpëtuar vendin, është që rinia të dalë në protesta për t’i thënë së keqes.
“Nuk jam shkëputur. Brenda familjes sonë nisi një luftë, për interesa personale që dëmtonte interesat e demokratëve e shqiptarëve. Në një moment, ajo që kam bërë është të marr vendimin të tërhiqem me qëllim që lufta të mos vijonte e ti jepja shans një paqëtimi në radhët tona, ndryshe i vetmi që përfitonte ishte kundërshtari ynë. Një vend pa opozitë kurrë mos e jetofshit, brezi juaj nuk e di, është diktaturë. Brenda një viti ajo që shpresova nuk ndodhi dhe gjërat shkuan më keq. Prisja tërheqje nga pala tjetër e kjo nuk ndodhi. nuk jam pishman për vendimin e marrë sepse një nga detyrimet kryesore, sprova e lidershipit është që në momentet të tilla të vështira të zgjedhin interesin tënd apo atë të njerëzve. Vendimin e mora për të kërkuar reflektim nga ata që e sollën punën deri këtu, kjo nuk ndodhi gjërat janë më keq, 14 maji është provë për këtë. Me heshtjen tuaj ka kumbuar një mesazh që ju e keni refuzuar këtë lloj politike. Pa u zemëruar ju dhe pa folur ju me zë të lartë, pa dalë me pankarta për t’i thënë jo të keqes dhe për t’u përballur me të, për të mbushur rrugët dhe sheshet, Shqipëria do të vazhdojë të lëngojë”, tha Basha.
