Kreu i Partisë Demokratike, Lulzim Basha, ka zhvilluar një takim me kreun e Konfindustrisë, Gjergj Buxhuku, dhe bashkëpunëtorët e tij, me të cilët ka diskutuar për situatën ekonomike dhe financiare të bizneseve, të krijuar gjatë kësaj kohe pandemie të koronavirusit.
Përmes një mesazhi në “Facebook”, Basha thekson se mungesa e konkurrencës së lirë, korrupsioni, burokracitë dhe taksat e larta, mbeten shqetësimet kryesore të industrialistëve shqiptarë.
Kreu i opozitës thotë se plani ekonomik i PD po përshtatet me realitetin e ri ekonomik të krijuar për shkak të pandemisë COVID-19.
Për të parandaluar burokracitë dhe konkurrencën e pandershme në treg, Basha shkruan se alternativa e tyre është “respektimi i sigurisë juridike e gërshetuar me politika të qëndrueshme fiskale dhe rregullatore” dhe “implementimi i taksës së sheshtë 9%, eleminimi i lejeve, licencave dhe autorizimeve”.
“Reformat tona do të jenë të qarta, konkrete dhe të realizueshme.”- shkruan Lulzim Basha. /Opinion.al
