Kryetari i Partisë Demokratike, Lulzim Basha ka komentuar deklaratat e djeshme të ish-kryeparlamentares Jozefina Topalli, e cila deklaroi se do t’i bashkohet “Lëvizjes për ndryshim”, një projekt i ri politik.
LEXO EDHE: Topalli rrëfen angazhimin e ri: Do i bashkohem “Lëvizjes për ndryshim”
Kryedemokrati tha se nuk paragjykon asnjë që është në opozitë me Edi Ramën por shtoi se kush bën të kundërtën do të marrë përgjigjen nga populli në zgjedhje.
“Sapo folëm për një proces që ka përfshirë demokratët në mënyrë të hapur pa përjashtim, po vendosim një standard të ri, nuk dua të paragjykoj asnjë që është në opozitë me Edi Ramën. Kush bën të kundërtën e ka të pamundur ta fshehë se qytetarët nuk janë budallenj. Kush do të largojë Edi Ramën është i mirëpritur. Dikush që do të vendosë shenjën e barazimit mes atyre që i ka bërë vendit Edi Rama në këto 7 vite dhe një opozite që është përballur me të ditë për ditë, i shërben Edi Ramës. Nuk dua të merrem me emra, janë figura që kanë patur mbështetjen e demokratëve. Kush kërkon largimin e Edi Ramës është i mirëpritur. Kush kërkon t’ja zgjasë qoftë me një orë qëndrimin në krye të qeverisë do të marrë përgjigjen nga populli në zgjedhje.”, tha Basha. /Opinion.al
