Kreu i Partisë Demokratike, Lulzim Basha, të shtunën, është takuar me fermerë të Elbasanit nga ku bëri me dije se qeveria dhe Edi Rama po përpiqen të bëjnë një kolektivizim të dytë të fshatit.
Basha tha live në Facebook, se Shqipëria është i vetmi vend në Europë që nuk ka subvencione për fermerët.
Fjala e Bashës:
Rama na ka kthyer në kohën kur e gjithë Shqipëria punonte për Byronë Politike, por Shqipëria diti t’ia japë përgjigjen para 27 vjetësh. Po sot do të dijë t’ia japë përgjigjen. Kjo është pyetja që duhet t’i shtrojëm vetes tonë, për veten tuaj, për familjet tuaja, për tokat tuaja, për djersën tuaj që e vadisni këtë tokë me djersë. Duhet të ngriheni, të merrni fatin tuaj në duart tuaja.
Koha e fjalëve po merr fund, ka marrë fund është koha e veprimeve. Po nuk u çuat, po nuk e kundërshtuat vendosjen e TVSH-së edhe për fermerët me NIPT që kanë xhiron mbi 2 milionë lekë nesër siç e tha Rexhepi do të vijë t’ju marrin tokën. E keqja nuk di të ndalet po nuk e ndalëm të gjithë bashkë.
E ndalëm të keqen bashkë të jeni të sigurt që ne do të aplikojmë masat çliruese për fermerët dhe biznesin në tërësi. Duke nisur me heqjen e taksës “Rama” të qarkullimit, që e ka bërë naftën shqiptare, naftën më të shtrenjtë të Europës, do ta heqim atë taksë.
Duke vazhduar me subvencione të drejtpërdrejta bazuar në numrin e identifikimit të fermerit se nuk kanë nevojë për NIPT, çfarë duhet NIPT-i kur ju keni kartën e identitetit. TVSH-në do ta vendosim mbi 12 milionë lekë të reja në vit, jo 2 milionë. Deri në 12 milionë lekë të reja në vit apo 120 milionë lekë të vjetra në vit nuk do të ketë TVSH, por do të ketë një pullë tatimore për biznesin e vogël dhe një dokument identifikimi për fermerët apo për të tjerët të cilat kanë xhiro nën 12 milionë lekë të reja.
Do të keni subvencione. Taksat që merren do të kthehen në subvencione. Madje do të ketë më shumë lek që do të vijnë në fshat, seç paguan taksa fshati. Sepse kështu ndodh në të gjithë Europën. Do të keni më shumë lek seç paguani taksa. Taksa e karburantit, taksa Rama, do të eliminohet, karburanti do të jetë më i lirë se në Maqedoni dhe Kosovë.
Do të merrni lek për dynym dhe krerë bagëtie që mbarshtohen dhe insfrastruktura e fshatit do të jetë prioritet dhe ne ndaj dy mandatet tona ia kushtuam insfrastrukrturës kombëtare, që lekët më pas të shkonin për infrastrukturën brenda qyteteve dhe brenda fshatrave.
Këtu të gjithë lekët që duhet për të rregulluar rrugët e fshatit i bën shatërvan. I bën palma, i bën kulla, i bën pisha, i bën buzëkuq, i bën kolltuqe, i bën perde, i bën check-up-e. Pra ai po vjedh paratë tuaja dhe po i shpërdoron ato për investime luksi ndërkohë që ju s’keni ujë të pijshëm, më thatë se uji për arat ju vjen në qershor. Ju nuk keni abslutisht asnjë mbështetje nga shteti për punën shumë të vështirë që zhvilloni në bujqësi dhe blegtori.
Kjo është e keqja se ju jeni të braktisur. Qeveria jua merr ju dhe ua jep një grushti njerëzish.
Kjo duhet të marrë fund. Prandaj duhet të ngriheni të gjithë bashkë. Të ngrini zërin për të drejtat tuaja, protestoni për mungesën e subvencioneve, për mungesën e investimeve në insfrastrukturë, rrefuzoni taksat e rritura, refuzoni që të futeni në skemën e TVSH-së përmes dinakërisë me NIPT-in për fermerët.
