Kryetari i Partisë Demokratike, Lulzim Basha është takuar këtë të enjte në Zagreb me kryeministrin e Kroacisë, Anrej Plenkoviç.
Në këtë takim ku në fokus kishte integrimin e Shqipërisë në Bashkimin Evropian, Basha tha se Plenkoviç i ka garantuar se Kroacia do të jetë një mbështetje e madhe në këtë proces, që sipas Bashës ka ngelur në vendnumëro për tetë vite.
“Ashtu siç bashkëpunuam gjatë procesit të anëtarësimit të Shqipërisë dhe Kroacisë në NATO, ashtu do të bashkëpunojmë ngushtësisht edhe në procesin e anëtarësimit të Shqipërisë në BE. Në këtë kuadër, përvoja dhe ndihma e Kroacisë që është dhe vend anëtar i BE, është shumë e vyer për ne.
Jam i lumtur të ndaj me ju angazhimin e kryeministrit Plenkoviç për të na ndihmuar në këtë proces qoftë me mbështetje politike në tryezën vendimmarrëse të BE, siç bëri gjatë Presidencës kroate, kështu edhe në nivelin teknik që të jemi sa më të përgatitur e të ecim sa më shpejt në këtë proces.”- është shprehur Basha.
Sipas Bashës Kroacia ka një model turizmi të mirë, në të cilin në qeverisejen e PD pas 25 prillit do të merret në konsideratë këtu në Shqipëri si një model suksesi.
“Së fundmi, Kroacia ka një eksperiencë shumë të mirë edhe në fushën e turizmit, një prioritet i qeverisë time nesër, dhe për këtë ne do të bashkëpunojmë ngushtësisht për të marrë modelet më të mira të zhvillimit që do të sjellin rritje ekonomike dhe punësim për qytetarët tanë”, – u shpreh Basha./Opinion.al
