Kreu i opozitës, Lulzim Basha ka pritur sot në një takim profesorin amerikan Daniel Serwer i cili është një ekspert i rajonit të Ballkanit.
Basha shkruan se ka bashkëpunuar më parë me Serwer në kohën që Shqipëria është anëtarësuar në NATO. Gjatë bisedës Basha i ka shprehur atij shqetësimin për gjendjen e demokracisë dhe luftën ndaj krimit dhe korrupsionit dhe i ka rikonfirmuar qasjen e Shqipërisë drejt Europës.
“Daniel Serwer ështe një mik i çmuar me të cilin kam bashkëpunuar ngushtë në vitet e anëtarësimit te Shqipërisë në NATO dhe procesit të pavarësimit të Kosovës. Pata kënaqësinë ta pres në Tiranë ku bashkë me shqetësimin për gjendjen aktuale të demokracisë, sundimit të ligjit dhe krimit dhe korrupsionit, ndamë bindjen se Shqipërinë e pret një e nesërme plot shpresë dhe mundësi për zhvillim dhe mirëqenie reale dhe të prekshme nga të gjithë shqiptarët. Shqipëria ka vetëm një alternativë, rruga europiane dhe anëtarësimi në BE” shkruan Basha.
Serwer ishte dje në konferencën ‘Shtetet e Bashkuara të Amerikës në Ballkanin Perëndimor’ ku përshëndeti arritjet e Shqipërisë dhe kritikoi vendimin e Francës dhe Holandës për të mos hapur negociatat për anëtarësim në tetor. /Opinion.al
