Kreu i opozitës Lulzim Basha ka zhvilluar sot një mbledhje me dyer të mbyllura me Kryesinë e Partisë Demokratike dhe ish-grupin parlamentar.
“Rama kërkon t’u mbyllë gojën mediave duke i bërë presion kujtdo që hedh dritë mbi abuzimin dhe korrupsionin. Qëllimi i Edi Ramës është mbyllja e gojës së opozitës për faktin e vetëm së kemi zbuluar dhe denoncuar lidhjet e këtij pushteti me krimin, vjedhjen e fondeve, korrupsionin dhe PPP korruptive”, mësohet të ketë thënë Basha.
Kreu i demokratëve i ka folur edhe për gjendjen ekonomike e cila sipas tij “është rënduar pas dështimit të qeverisë për të menaxhuar pasojat e tërmetit dhe përpjekja kriminale për t’u mbyllur gojën mediave”.
Në lidhje me dënimin e Ervin Salianjit, Basha tha: “Ervin Salianji mori dënim politik sepse denoncoi përfshirjen në trafik droge të Ministrit të Brendshëm. Dënimi i Salianjit tregon se si po e përdor Rama drejtësinë. Tahiri që kanabizoi Shqipërine me Ramën dënohet me punë në shërbim të komunitetit, Salianji që denoncoi trafikun e drogës, dënohet me burg”.
Burime nga mbledhja shtojnë se Basha ka njoftuar se “dita e nesërme e në vazhdim do të jetë periudha më intensive politike”. /Opinion.al
