Lulzim Basha ka sulmuar sot ish-ministrin e Ramës dhe një nga figurat kryesore në PS Arben Ahmetajn. Gjatë turit të tij në rrethe për të marrë votat e demokratëve, Basha tha se “paratë u derdhën lumë nga një nga kapot e korrupsionit që është Arben Ahmetaj, duke paguar shuma marramendëse, deri në 100 mijë euro për 40 vota në Stan të Ri”.
Basha ishte në me demokratët e Lezhës, Mirditës, Kurbinit, Krujës e Fushë-Krujës ku pasi akuzoi partitë në qeveri, PS, LSI, PDIU se kanë blerë votat shtoi se edhe ai vetë ka gabime por pa i specifikuar se cilat janë ato.
“E nisëm këtë betejë me qëllim garantimin e zgjedhjeve të lira, të lira nga droga, të lira nga krimi, të lira nga korrupsioni që i mori shpirtin shqiptarëve në cdo nivel. Milionat ishin derdhur tashmë. Qindra mijëra votues ishin kapur jo prej një jave, por prej muajsh të tërë. Varfëria e tyre ishte blerë, integriteti i tyre ishte përdhosur. E vetmja forcë politike që nuk u angazhua në shitblerje votash është Partia Demokratike. E vetmja forcë politike që nuk u angazhua në joshje, shantazhe, terror dhe presion ndaj votuesve, është Partia Demokratike”.
Ndërsa duke folur për gabimet e tij si lider i PD, tha se “kush i kupton gabimet ka dhe vullnetin ti ndreqë”.“Marr përgjegjësitë e mia dhe pranoj përgjegjësitë e mia në këtë proces. Gabimet e mia janë të gjitha politike, sepse prej minutës së parë asgjë se kam bërë për veten time, për pushtetin tim, apo për karrigen time, por gjithçka e kam vënë në funksion të Partisë Demokratike dhe demokratëve të thjeshtë”.
