Kreu i Partisë Demokratike, Lulzim Basha, teksa ka zhvilluar një takim me studentët e Universitetit Politeknik është shprehur se problemet e studentëve në Tiranë janë problem për gjithë Shqipërinë.
Basha premtoi se kur Partia Demokratike të marrë drejtimin e vendit do të anuloi kontratat me dy oligarkë, dhe paratë që do të përfitohen do të investohen për projekte univesitare.
Po ashtu, kryedemokrati tha se pas marrjes së qeverisë nga PD, do të bëjë një lidhje koherente mes universiteteve dhe tregut të punës, duke drejtuar studentët më së miri në tregun e punës.
Ndërkohë ai premtoi se do të anuloi dhe Ligjin për Arsimin e Lartë, ndërsa ligji i ri do të bëhet me transparencë të plotë.
“Qeveria e ardhshme nuk do të jetë si kjo, që jep kontrata dhe koncesione për oligarkët. Unë isha në Gjermani dhe pashë atje një shembull sesi veprohet me universitetet. Iu premtoj se do të anulojmë kontratat me 2 oligarkë dhe paratë do të kthehen për projekte universitare.
Programi që ju parashtrova nuk do të funksionojë nëse vendimet do ti marrë prapë kryeministri dhe ministri i arsimit. Demokratizimi i vendimarrjes, moderrnizimi i universiteteve, sipas modelit europian do të jetë tipari i ligjit të ri për arsimin e lartë, për të cilin kemi ngritur një grup pune me ekspertët më të mirë dhe do ti bëjmë një ftesë publike shumë shpejt pedagogëve dhe ekspertëve më të mirë shqiptarë, studentëve, që të bëhen pjesë e këtij grupi pune.
Jo thjeshtë ta anullojmë këtë ligj ditën e parë në qeveri, siç ju kam premtuar dhe dua të jua premtoj sot këtu. Por të kemi gati në mënyrë të plotë të konsultuar, transparente, ligjin e ri për Arsimin e Lartë të standarteve europiane”-tha Basha./ Opinion.al E.Xh.
