Kryedemokrati Lulzim Basha, në një tjetër reagim për mediat ka theksuar se Rama ka bërë skenar për përplasje. Sipas tij protestuesit erdhën për të protestuar pa dhunë.
“Ky që shohim është një skenar. Ju e patë sesi, pas një përpjekjeje fare të lehtë nga një grup banorësh të Unazës, papritur u ça kordoni i policisë, që të përdorej dhuna, të hidhej gazi lotsjellës. Dhe e gjitha kjo që dëgjoni në altoparlant, është pjesë e një skenari kriminal të policisë, të vënë nën urdhrat e Edi Ramës, për të provokuar një gjendje të tillë. Protestuesit kishin ardhur për të demonstruar paqësisht, pa dhunë. Po flisnin qytetarët. Në qendër të sheshit po flisnin qytetarët e Unazës, po flisnin fermerët, studentët, minatorët dhe, për shkak të skenarit të tyre ogurzi, tani gjendja ka dalë jashtë kontrollit dhe nuk duket asnjë polic, askund. Nuk merr kontakt me organizatorët e protestës, por vazhdon t’i fryjë skenarit të përplasjes dhe të dhunës me këto mesazhe idiote. Policia nuk po zbaton ligjin, policia e ka thyer ligjin”
Protestuesit opozitarë të mbledhur në Bulevardin Dëshmorët e Kombit kanë thyer kordonin e policisë dhe kanë arritur para derës së Kryeministrisë. Me hekurat e skelave të vendosura në hyrje të godinës, protestuesit tentuan të thyejnë dyert.
Protestuesit kanë hedhur shashka e molotov në drejtim të godinës së Kryeministrisë, duke thyer edhe një prej xhamave të derës së godinës. Nga brenda Kryeministrisë efektivët e policisë kanë hedhur ujë në drejtim të protestuesve për t’i larguar nga hyrja e saj. Disa protestues janë shfaqur në vështirësi, dyshohet si pasojë e gazit lotsjellës. Ndërkohë që edhe liderët e opozitës kanë mbuluar fytyrat me shami për t’u mbrojtur nga gazi lotsjellës.
