Kryetari i Partisë Demokratike, Lulzim Basha, pak minuta më parë, në një deklaratë për mediat ka kritikuar ashpër qeverinë Rama për shkarkimin e ministrit të Drejtësisë, Ylli Manjani.
Basha deklaroi se shqiptarët meritonin një shpejgim nga kryeministri Edi Rama se pse mori vendimin për të shkarkuar, sot, Manjanin si ministër Drejtësie.
Ai theksoi se ministri Manjani ka kritikuar hapur qeverinë për drogën, për mos arrestimin e Klement Balilit apo urdhërimet me telefon të gjyqtarëve nga kreu i Qeverisë.
“Manjani theu kodin e heshtjes. Manjani theu omertan që Rama i ka imponuar një qeverie të zhytur në krim drogë dhe korrupsion. Deklarata e Manjanit është tjetër konfirmim i të vërtetave që opozita ka denoncuar. Propaganda qeveritare nuk i mbulon dot më këto të vërteta.
Sot Edi Rama nuk ka më nevojë për asnjë aleat politik. Ai ka ngritur dhe fuqizuar një aleancë interesash private dhe kriminale. Pushtetin e tij e mban në këmbë me anë të krimit. Me shkarkimin e Manjanit u provua se Edi Rama është peng i krimit dhe Ilir Meta është peng i tij. Zgjidhja është largimi i tyre”, u shpreh kryetari i PD Lulzim Basha.
