Kryetari i Partisë Demokratike, Lulzim Basha është shprehur mëngjesin e sotëm se Shqipëria investon më pak se çdo vend tjetër për kujdesin shëndetësor.
Përmes një postimi në “Facebook”, kryedemokrati shprehet se investimet e ulëta kanë sjellë si pasojë reduktimin e numrit të mjekëve si dhe uljen e pagave të tyre.
Më tej, lider i opozitës shkruan se çdo pasojë që vjen nga investimet e ulëta, janë në kurriz të qytetarëve shqiptarë, të cilët paguajnë më shtrenjtë ilaçet dhe trajtimet mjekësore.
Basha thotë se kryeministri Edi Rama nuk i ka mbajtur premtimet ndaj qytetarëve, duke përmendur premtimin për shëndetësi falas në vendin tonë. Ai thekson se kur Partia Demokratike të vijë në qeverisje, Shqipërisë do t’i kthehet shpresa.
“Shqipëria investon sot më pak se çdo vend tjetër për kujdesin shëndetësor. Prandaj numri i mjekëve për frymë në Shqipëri është më i ulëti. Kjo është arsyeja pse pagat e mjekëve tanë, që tani po luftojnë në vijën e parë kundër pandemisë, janë më të ultat. Ata që e vuajnë këtë në kurrizin e tyre janë shqiptarët, të cilët paguajnë fatura të shtrenjta për ilaçet dhe trajtimin mjekësor. Nuk ka pse të vazhdohet kështu. Ne mund dhe duhet të investojmë më shumë në shëndetësi. Ne mund ti paguajmë më mirë mjekët dhe infermierët tanë dhe mund të shtojmë numrin e tyre. Ne mund të rimbursojmë më shumë për ilaçet dhe ti bëjmë të përballueshme për të gjithë. Të gjitha këto mund të bëhen. Për 7 vite Rama i la në baltë shqiptarët me premtime të pambajtura si ai për shëndetësinë falas. Boll më. Nuk mund të vazhdohet më kështu. Bashkë do ta largojmë të keqen dhe do të sjellim ndryshim dhe shpresë të re për Shqipërinë.”-shkruan Basha./ Opinion.al
