Kryetari i PD Lulzim Basha tha para gazetarëve se është në dispozicion poër të gjetur një zgjidhje për bashkimin e PD, por ai nuk ju përgjigj pyetjes së gazetarëve nëse do të ishte i gatshëm për dorëheqje.
“Grupi parlamentar ka patur një diskutim të gjatë për gjendjen ku ndodhet PD. Kam konstatuar që na përbashkon, vendosmëria për të bërë gjithçka për të përbashkuar PD. Si kryetar i PD përgjegjësia bie mbi mua, ndaj ndava me grupin parlamentar vënien time në dispozicion të zgjidhjes në të gjitha format që ndihmojnë përbashkimin e PD”, tha Basha.
I pyetur nga gazetarët nëse do të pranonte të jepte dorëheqjen e artikuluar nga një numër i madh deputetësh, Basha tha se në mbledhjen e sotme nuk u kërkuan koka turku.
“Sot grupi ka bërë analiza të gjendjes, nuk ka kërkuar as koka turku dhe as justifikime. Ajo që dua t’ju them sot, që për mua, gjëja më e rëndësishme është bashkimi i demokratëve. Në të njëjtën mënyrë do të ecim përpara. Sa më takon mua jam në dispozicion të zgjidhjes me gjithçka kam në dorë”, tha Basha./Opinion.al
