“Pranvera sapo ka nisur, ndryshimi po vjen”. Kryedemokrati Lulzim Basha nga Rogozhina duke ftuar qytetarët për protestën e 13 prillit tha se nuk do të ketë asnjë pazar apo marrëveshje të fshehtë sipas tij me qeverinë.
E vetmja marrëveshje, sipas Lulzim Bashës, do të jetë ajo për të shembur sistemin, duke refuzuar kështu dhe ofertën e qeverisë për reformën zgjedhore.
“Nuk ka dhe nuk do të ketë kthim pas, deri sa së bashku ta shembin këtë sistem. Nuk do të ketë pazar mbi sakrificat tuaja. Nuk ka dhe nuk do të ketë asnjë zgjidhje tjetër, përveç një zgjidhjeje të thellë politikë që do të sjellë një Shqipëri evropiane”, theksoi Basha.
Sa i përket “tradhtarëve” nga lista e PD, që pranuan mandatin e deputetit, Basha po ashtu shprehu dhe një pendesë. Sipas tij deputetët nuk do të zgjidhen më nga kryetari i partisë e të jenë sekret, por nga populli.
“Deputetët e ardhëm nuk do të përcaktohen më në mënyrë misterioze, nga një njeri. Por do të përcaktohen nga qytetarët. Ju do të jeni ata që do të përcaktoni me votë deputetët e ardhshëm të PD. Në këtë mënyrë deputetët e ardhshëm nuk do të jenë njerëz, pa emër, pa zë për të vjedhur me ligj taksat tuaja. Nuk do të jenë njerëz që do ta lidhin fatin e tyre me kryeministrin, me kryetarin e partisë. Fati i tyre do të jetë i lidhur vetëm me ju”, tha Basha.
Arlind Çarçani, kreu i FRPD në Ersekë, dorëzoi të premten në KQZ formularin e dekriminalizimit për të marrë mandatin e deputetit. Të enjten që vjen, Parlamenti minimalisht shkon në 102 anëtarë, ndërkohë që Arlind Çarçani dhe Halil Jakimi do të duhet të marrin më parë dritën jeshile nga votimi i KQZ.
Pas daljes së opozitës nga Parlamenti, ka ndryshuar edhe konfigurimi i partive në sallë. LSI është tani grupimi i dytë më i madh në Kuvend, ndërsa PD e treta. /Opinion.al
