Pas fjalës së Ramës ku i bënte thirrje Bashës të pranonte vogëlsinë e tij dhe të rritej, duke i cituar shpesh Papën dhe duke i përmendur “ditën e tolerancës”, kreu i PD-së është ngjitur në foltore me disa akuza të rënda për qeverinë. Ai e ka cilësuar rritjen e TVSH-së si abuzive për t’i bërë nder familjarëve të tij duke cenuar bukën e gojës së shqiptarëve.
Basha rrëfeu edhe një episod të tijin në avion, ku 25 të rinj ishin kthyer brenda ditës nga Gjermania.
“Të martën teksa po udhëtoja drejt Gjermanisë, kisha në avion 25 të rinj të cilët ishin kthyer nga autoritetet gjermane brenda ditës”-tha Basha, duke vënë theksin te pabesueshmëria që kanë shqiptarët për të lëvizur në vendet shengen.
“Shqiptarët e kanë fituar të drejtën për të udhëtuar lirshëm që në vitin 2010, dhe 7 vite më vonë kthehen si dele” – është shprehur Basha, duke fajësuar Ramën për këtë gjë.
Basha më pas është ndalur te çështja Tahiri, duke i kujtuar Ramës se shqiptarët nuk janë budallenj për të besuar se të gjitha episodet që i kanë ndodhur Tahirit, janë thjesht rastësi.
