Lulzim Basha ishte sot në Kukës për të kërkuar votat e këtij qarku për 25 Qershor. Ai ironizoi Ramën e Metën kur tha se njëri i bie daulles dhe tjetri le të kërcejë se nuk i ka mbetur gjë tjetër. Sipas tij, dy ish-kryetarët e koalicionit i ka ndarë tepsia e pushtetit.
“A e keni dëgjuar Edi Ramën të bëjë bilanc? A e keni dëgjuar Edi Ramën të japë llogari për ato që premtoi që do të bënte dhe nuk i bëri? Vetëm cirk, vetëm barcoleta, vetëm batuta… Një herë me çitjane e një herë me tuta. Nga Facebook-u në ekspozita, nga futbolli në basketboll. Prite kur të vijë të bëjë vertikalen këtu në Kukës. Se ai tjetri erdhi me daulle dje. Ky është bilanci, prandaj i ka ngelur makina pa motor dhe me një timon deri në Mirditë, nuk vjen dot në Kukës”,u shpreh Basha.
Më tej kreu demokrat tha: “Ne jemi të bashkuar, ata janë të përçarë. I ka përçarë tepsia e pushtetit. Le t’i bjerë sa të dojë Ilir Meta daulleve, nuk ka për të pasur më shi për tokat e SHPK-së. Kukësi i priu betejës së madhe më 18 shkurt dhe sot dua t’ju pyes: a jeni gati ta çojmë këtë betejë deri në fitoren vendimtare?”
