Kreu i opozitës Lulzim Basha po zhvillon një bashkëbisedim me gazetarët, lidhur me zhvillimet politike të kësaj periudhe dhe për betejat e reja ku do përqëndrohet aksioni politik i PD.
Basha lajmëroi se këtë Gusht opozita nuk do të bëjë pushim, sepse ka përballë detyrën për realizimin e shpresës së qytetarëve shqiptarë përballë situatës kaotike që ka prodhuar sipas tij, qeverisja e Edi Ramës.
Basha deklaroi se qeverisja e Edi Ramës e ka zhytur vendin në kolaps ekonomik, duke prodhuar pasiguri për qytetarët.
“Një pjesë e madhe e qytetarëve nuk do të bëjnë pushime për shkak të kolapsit ekonomik ku e ka futur vendin qeverisja e Edi Ramës për shkak të varfërisë, krizës, çmimeve të papërballueshme, gjendjes së familjeve shqiptare, si shkak i taksave të larta. Qytetarët sado të mëdha ti kenë hallet, janë të vetëdijshëm se kjo situatë nuk ka rënë nga qielli, por është rezultat i politikës së Edi Ramës”.
Sipas Bashës, opozita ka udhëhequr proceset më të rëndësishme në vend si ai i dekriminalizimit dhe t’i imponojë kësaj mazhorance konsensusin për ligjin e dekriminalizimit.
