Kryetari i Partisë Demokratike, Lulzim Basha, të enjten është shprehur se kryeministri Edi Rama po sulmon opozitën për të fshehur të vërtetën në lidhje me heqjen padrejtësisht të ndihmës ekonomike për familjet në nevojë.
Gjatë një interviste me gazetarët, jashtë sallës së Kuvendit, Basha tha se Rama u tregua i pandjeshëm dhe nuk ka asnjë ndjenjë dhembshurie për qytetarët që gjenden me sytë nga qielli.
“Edi Rama është njeri i cili e ka faktuar se zgjedh të sulmojë opozitën me të vetmin qëllim për të fshehur të vërtetën dhe përgjegjësinë që ka karshi këtyre njerëzve”,- u shpreh kreu i PD-së.
Sipas tij, kjo është një alibi e shëmtuar dhe e papranueshme për të lënë pa bukë mijëra familje.
Ai tha se kjo është përgjegjësia e kryeministrit, ne do të bëjmë gjithçka, sikurse do luftojmë që kjo emergjencë të marrë fund.
