Kryetari i Partisë Demokratike, Lulzim Basha, është shprehur se për të mbajtur pushtetin kryeministri Edi Rama po nxitë vëllavrasjen në Shqipëri.
Sipas tij, për këtë qëllim Rama po përdor Prokurorinë, Gjykatat për të dënuar personat që dalin kundër tij, siç ndodhi me dy krerët e degëve të PD.
Basha e cilësoi fushatën e Ramës për zgjedhjet lokale si të paligjshme, pasi data e 30 qershori u anulua nga presidenti Ilir Meta.
“Prandaj, tani ai ka vendosur të zbatojë një plan të rrezikshëm, për nxitjen e ndarjeve dhe përplasjeve sociale në Shqipëri. Edi Rama tani po kërkon të nxisë dhunë masive në Shqipëri, ai po kërkon të nxisë përplasje mes qytetarëve, po kërkon të nxisë luftë mes militantëve të ndryshëm politikë, po kërkon të nxisë vëllavrasjen mes shqiptarëve. Për këtë qëllim, ai po përdor policinë, prokurorinë, gjykatat dhe mercenarët e tij në media, për të krijuar ngjarje që provokojnë, që ndezin emocionet, që nxisin revoltim dhe reagime publike. Këtë qëllim kanë arrestimet e fundit të drejtuesve të PD. Këtë qëllim kanë përplasjet e policisë me qytetarët protestues. Këtë qëllim ka vazhdimi i një fushate të paligjshme. Këtë qëllim ka retorika e djegies, përmbysjes dhe e dhunës. Motoja e Edi Ramës tani është: Çdo gjë të sakrifikohet, çdo gjë të shkretohet vetëm që ai ai të ruajë karriken dhe milionat e tij. Është një plan i dëshpëruar që do sjellë fundin e tij, dhe ne nuk do lejojmë që fundi i Edi Ramës të arrihet me kosto për Shqipërinë. Ndaj dua t’u bëj thirrje së pari të gjithë atyre që e ndjekin verbërisht nga pas në këtë aventurë, që të mos bëhen kurban i Edi Ramës. U bëj thirrje veçanërisht punonjësve të institucioneve ligjzbatuese: refuzoni të bëheni vegla të verbra për të shkelur ligjin, për të dhunuar popullin dhe për të kryer krime në emër të Edi Ramës. Ne nuk do të na thyeni dot. Ne nuk do na lëvizni dot asnjë centimetër”.-tha Basha./ Opinion.al E.Xh.
