Lulzim Basha mblodhi sot në çadër urbanistë dhe arkitektë të cilët kritikuan disa projekte të qeverisë dhe mënyrën klienteliste të dhënies së tenderave.
Ndërsa vetë Basha tha se janë harxhuar miliona për projekte fasadë gjatë qeverisjes së të majtës.
“Por fasada nuk është vetëm simboli i gënjeshtrës, fasada është edhe instrumenti i vjedhjes së shqiptarëve. Pas fasadave ka një tavolinë ku bashkohen pushtetarë të korruptuar, kriminelë, oligarkë dhe media të bëra njësh me qeverinë, me një qëllim, të vjedhin Shqipërinë. Edi Rama në 4 vite, ka harxhuar 500 milionë euro për projekte fasadë”, u shpreh Basha.
Sipas tij, pas fasadës “ne po bëjmë shtet” fshihet kanabizimi i vendit.
“Pas uniformave të reja të policisë, po kështu një fasadë me anë të së cilës Rama -Tahiri kanë vjedhur milionat e taksapaguesve shqiptarë, ndodhet mafia më e rrezikshme në Evropë, narkomafia e cila ka shndërruar Shqipërinë në hambar droge. Kjo fasadë ka qenë dhe mbetet thelbi i propagandës së Edi Ramës, propagandë që paguhet me këto para dhe paguhet shtrenjtë shumë. Dje, EUROPOL-i, ka bërë publik raportin për gjendjen e narkotikës në Europë. Fasada e Edi Ramës: Ku është droga? EUROPOL-i për fat të keq e thotë fare qartë. Shqipëria është numër një për kanabisin në Europë dhe vend kryesor për trafikun e drogës”, vijoi akuzat lideri demokrat.
