Kreu i Partisë Demokratike, Lulzim Basha ndodhet në Lezhë në një takim me qytetarët, ku ndër të tjera deklaroi se do të japë kartën e anëtarësimit në Partinë Demokratike për 150 anëtarë të rinj, duke shtuar se këto anëtarësime janë dëshmi e shpresës dhe besimit të shqiptarëve tek PD.
Në fjalën e tij Basha tha se basti i Ramës për të shkurajuar shqiptarët, humbi më 16 shkurt ditën e nisjes së lëvizjes demokratike popullore, për t’i dhënë fund asgjësimit të sovranit me parlament, drejtësi dhe ekonomi falso, ndaj sipas tij Rama është i çoroditur dhe i shkëputur nga realiteti.
Ai e cilësoi fushatën e vitit 2017 si më kriminalen në Ballkan, pasi sipas tij Rama me bandat kriminale blenë, vodhën e tjetërsuan votat për të marrë pushtetin.
“Beteja kryesore e Ramës ndërsa shtrëngon lakun në fytin e cdo shqiptari, kapi parlamentin e zgjedhjet, paralizoi prokurorinë për të mbyllur dosjet e korrupsionit, furitë e propagandës më të shfrenuar dëgjohen nga mëngjesi në darkë se Shqipëria nuk ka asnjë problem, madje edhe shqiptarët e ngritur në protestë janë ftesë për turistët. E kuptoni deri ku shkon çoroditja. I ka ik truni komplet. Pse? Sepse nuk po i funksionon më instrumenti kryesor më të cilën ka marrë pushtetin, shkurajimi i njerëzeve, t’i heqë shpresën, të thotë se nuk ka më mirë se ky sharlatan, të ofrojë një spektakël bajat në mediat e blera. Basti i tij ka qenë frikësimi i njerëzve, kush del mbron të drejtat e tyre, janë shpellarë, studentët në protestë janë ngelës, sipërmarrësit janë njerëz që nuk meritojnë të dëgjohen. Shkurajimi i shqiptarëve ka qenë formula mbi të cilin është ndërtuar bashkëpunimi i Edi Ramës me krimin. Por basti i Ramës për të shkurajuar shqiptarët, humbi. Plot 11 javë më parë, më 16 shkurt ditën e nisjes së lëvizjes demokratike popullore. Për t’i dhënë fund asgjësimit të sovranit me parlament, drejtësi e ekonomi falso. Kjo ëndërr e Ramës u thërrmua nga bashkimi popullor i 16 shkurtit. Ne iu bindëm verdiktit të popullit pasi shteruam cdo mundësi për të korrigjuar nga brenda këtë sistem të kalbur. Përdorëm cdo instrument nga komisionet parlamentare, që do të vërtetonin se Edi Rama me Gjiknurin, Dakon, Xhafën, etj, u përfshinë në ndërmarrjen më kriminale. Shndërruan fushatën elektorale në fushatën e korrje shirjeve të krimit, duke instaluar bandat kriminale në vend”, u shpreh Basha.
