Kreu i PD-së, Lulzim Basha në një konferencë për mediat ka treguar se çfarë do të arrijë opozita dhe shqiptarët me marrëveshjen e re, për reformën zgjedhore.
Basha dha garanci se me këtë reformë do të kthejë lirinë e votës. “Kjo betejë nuk bëhet as për karrigen tonë, në mandatet tona i dogjëm për t’i treguar botës mbarë se çfarë po ndodh këtu”, tha Basha. Sipas tij me këtë marrëveshje janë plotësuar tre kushtet e opozitës
“Lufta e krimit në politikë, ndëshkimi i krimit elektoral nga Dibra e kudo, ja dy kushte të opozitës së bashkuar. Pavarësisht, propagandës së shfrenuar të atij që për katër vite me radhë u mundua të anashkalojë kushtet e Bundestagut, faktet janë këto: Reforma Zgjedhore nuk do të diktohet nga qeveria e dalë me zgjedhjet e blera. Vendimet për Reformën Zgjedhore do merren mes opozitës së bashkuar dhe parlamentit monist, plus patericat e veta. Këto janë tre kushtet tona”, tha Basha.
Për arritjen e kësaj marrëveshje ai falënderoi veçanërisht ambasadorin britanik në Tiranë, për të cilin tha se vuri në lëvizje mekanizmin që qeveria të pranonte tre kushtet e opozitës.
LEXO EDHE- Grupi demokrat kundër marrëveshjes për Reformën Zgjedhore
Reforma u ra dakord që të diskutohet dhe hartohet jashtë parlamentit në tryezën politike të partive, dhe produkti i saj konsensual të miratohet pa ndryshime nga komisioni dhe Parlamenti.
Në Këshillin Politik të ngritur mes pozitës dhe opozitës marrin pjesë përfaqësues të opozitës së bashkuar, drejtuesit e Komisionit Parlamentar të Reformës Zgjedhore, si dhe përfaqësues të grupeve parlamentare në Kuvend. Shumica ra dakord të mos ndryshojë produktin e dakortësuar me opozitën, në Komision apo në seancë plenare. Krahas rekomandimeve të OSBE/ODIHR-it, palët ranë dakord të diskutojnë edhe çdo problematikë tjetër zgjedhore, që i shërben arritjes së standardeve zgjedhore ndërkombëtare./ Opinion.al
