Kreu i Partisë Demokratike, Lulzim Basha ka përshëndetur deklaratën e Misionit të KiE. Basha shkruan se raporti ritheksoi se në 30 Qershor nuk pati zgjedhje, se pushteti vendor sot nuk është pluralist, dhe as i qytetarëve.
“Përshëndes deklaratën e Misionit të KiE që ritheksoi se në 30/06 nuk pati zgjedhje,se pushteti vendor sot nuk është pluralist, dhe as i qytetarëve. Beteja më jetike sot është për zgjedhje të lira dhe të ndershme, për ti kthyer qytetarëve qeverisjen legjitime qendrore dhe vendore.”, shkroi Basha në Twitter.
Kujtojmë se delegacioni i nivelit të lartë të Kongresit të Autoriteteve Lokale dhe Rajonale të Këshillit të Europës (KiE), përfundoi misionin fakt-mbledhës në Shqipëri. Synimi i misionit ishte për të parë situatën aktuale të demokracisë vendore në Shqipëri, veçanërisht në sfondin e zgjedhjeve lokale të mbajtura në 30 qershor 2019.
Në një njoftim zyrtar mbi gjetjet paraprake KiE ka theksuar se zgjedhjet e 30 qershorit nuk kanë ndihmuar në zhvillimin e demokracisë por kanë çuar në më pak pluralizëm në nivel local cka sipas tyre ka dëmtuar demokracinë në nivel shtetëror.
“Për fat të keq, zgjedhjet lokale të vitit 2019 nuk ishin të favorshme për forcimin e demokracisë lokale në Shqipëri, por kanë çuar në më pak pluralizëm në bashki dhe në një erozion të mëtejshëm të besimit të qytetarëve në institucionet e këtij vendi”, deklaroi Gunn-Marit Helgesen , Presidenti i Dhomës së Rajoneve të Kongresit. /Opinion.al
