Lulzim Basha ka zhvilluar ditën e sotme një takim në Vlorë me të rinjtë ku ka folur rreth zgjedhjeve të 14 majit dhe ish-kryeministrin Sali Berisha.
Gjatë fjalës së tij Basha ka ironizuar sërish Berishën nga takimi me të rinjtë në Vlorë. Ai thotë se nuk është penduar për ditën kur përjashtoi Berishën nga grupi parlamentar.
“Përgjigjet e drejtpërdrejta kanë sukses të jashtëzakonshëm. Por kjo nuk është një përgjigje të cilës mund t’i përgjigjem me po apo jo. Natyrisht përgjigjja e shkurtë është jo, nuk jam bërë pishman. Nuk jam bërë pishman sepse vendimin nuk e kam marrë i nisur as nga interesi im, as nga interesi i një grupi të ngushtë. E kam marrë nisur nga interesi i demokratëve, të cilët e kanë parë me 14 majin se ku na çon vendimmarrja e gabuar, se ku na çon gjykimi pa mend në kokë”, tha Basha.
Ai madje thekson se nuk ka asnjë asye për t’u kthyer mbrapa, duke përfshirë këtu edhe vendimin e 9 shtatorit.
Sipas tij sa më shumë kohë kalon aq më i bindur është që vendimi i 9 shtatorit ishte vendimi më i drejtë.
“Shumica prej jush në këtë sallë besoj, por edhe të tjerë që prej dhjetorit të vitit 2021 e kanë marrë vendimin. Dhe ftesa ime është të bashkojmë sa më shumë qytetarë, sa më shumë demokratë rreth kësaj rruge, sepse ky është shansi i vetëm për ta çuar Partinë Demokratike drejt fitores dhe për ta çuar Shqipërinë tek ndryshimi i shumëpritur. Nuk ka asnjë asye për t’u kthyer mbrapa, duke përfshirë këtu edhe vendimin e 9 shtatorit. Prandaj, sa më shumë kohë kalon aq më i bindur jam që vendimi i 9 shtatorit ishte vendimi më i drejt, madje mund të them që nëse ka diçka që mund të korrigjoja, është që ky vendim të ishte marrë edhe më herët, për t’i çliruar demokratët edhe nga pesha e rëndë e të kaluarës”, vijoi Basha./Opinion.al
